الراجل و الراجل اوي

في كلمة حلوة سمعتها
 "الراجل بيحب الست لكن الراجل اوي هو اللي بيحافظ علي الست" :)

لأنك لم تعرفه بعد!!!!

السلام عليكم و رحمة الله و بركاته.
دايما الصحاب بيتاثرو ببعض عشان هما بيحبوا بعض عشان بقالهم كذا سنه مع بعض وعارفين بعض , والعائله كده برضه
ده لما بيبقى واحد صاحبك بتحبه و هو مش معاك دلوقتى بس كان متعود يعمل حاجة معينة انت ممكن تعملها عشان بتفكرك بيه.

كل الكلام الى انا بقولو ده يتمثل فى سيدنا محمد عليه الصلاه والسلام مع اصحابه كانو عرفينه كويس جدا عشان كانوا معاه ليل نهار و حبوه اكتر لما عرفوه وكانوا بيعملوا زيو فى كل حاجه حتى مشيته , ضحكه , أكله, طريقة كلامه , العطر اللى كان بيحطه , طريقة تعامله مع زوجاته, حتى الحاجات اللى مش فى الصفات زى قص الشارب واطلاق اللحية, وزى انه لم يعبه كبر البطن (اللى هو الكرش بلغتنا)
الموضوع ببساطة ان دول ناس بيحبوا واحد و واخدينه قدوة فى كل حاجة عشان عارفين أن كل حاجة بيعملها صح لأنه رسول من الله عز وجل.

زى بالظظظظظظظبط دلوقتى لما تلاقي الشباب الصغير بيقلد المغنين و لعيبة الكرة في كلامهم و مشيهم و قصة الشعر و اللبس.

فلما تسمع إن فى حاجة سنة و تلاقى نفسك بتقول انها مش فرض يعنى مش لازم تتعمل(و ده حقيقى) تعرف ان انت مش بتحب الرسول صلى الله عليه وسلم فعلا وده طبيعى.. ليه ؟؟؟؟؟
 لسبب واحد انك لسه متعرفوش ومتعرفش حياته كانت عمله ازاى ولا هو ازاى كان شايل همنا وكان بيستحمل اشد الاذي اللي مستحيل حد فينا يستحمله ،  حتى لما كان واحد بيموت على الكفر كان الرسول بيحزن لأن أفلتت نفس منه إلى النار. وفى نفس الوقت كان (بلغتنا) جنتل و زوء و حسن المظهر لدرجة ان الصحابة كانوا بيعرفو ان هو جى من رائحة عطره.
أنا متأكد أنك لما تعرف عنه أكتر هتحبه و هيبقى نفسك تبقى زيه فى كل حاجة وهيبقى نفسك تقلده في كل حاجة حتي اللحية و الحاجات اللي بتعتبرها حاجات مش مهمة في الدين.

وعشان نبقى عمليين دى سلسلة حياة الرسول صلى الله علية وسلم للدكتور طارق السويدان اسمع منها شريط كل جمعة يا سيدى.......و متستكترش انهم عشرين درس ، انت ممكن تعد تتفرج
 أول شريطين بيحكوا عن حال العرب قبل الرسول صلى الله عليه وسلم.
https://archive.org/details/seera-swudan

حاجات بسيطة

عارف في واحد لما تبقي ماشي و حد يخبطه في كتفه مثلا يروح متعصب اوي و مشمئز و باصصله كده و ساعات يروح واخد وضعية التحدي و يفضل ثابت مكانه لمدة ثواني كده :ى

واحد يبدورعلي حاجة ضايعة منه في البيت تلاقيه بيتعصب و يزعق و يقول انا كنت حاططها هنا و ينفجر في الشخص اللي كان مغير مكانها  و تلاقي ضغطه علي و بتاع

واحد و انت بتتناقش معاه تلاقي صوته يعلي تدريجيا و يبدا يتعصب عليك و ممكن يقولك في الاخر انت مبتفهمش حاجة و يسيبك و يمشي

في حاجات كتير الشخصية اللي من النوع ده بتعملها و دايما تلاقيه مبيحبش ناس كتير و في ناس كتير بتتخنق منه خصوصا اهل بيته اللي بيبقوا معاه كتير و لما تتعامل معاه تحس ان القعدة معاه تقيلة علي قلبك  (سواء ولد او بنت)…..

  :D :D المهم من الكلام ده ان ات متعملش كده … انا كاتبه عشان ابقي ماسك علي نفسي سيديهات لو انا جيت و بقيت اعمل التصرفات دي بعد كدة :D