السلام عليكم ورحمة الله وبركاته
الحمد لله ربيت دقنى بعد ما كنت من أكتر الناس اللى بتتخنأ من موضوع الدقن ده .....
*لو حد عنده تعليق على المكتوب أو عايز يضيف حاجة يا ريت يقوللى
الكلام ده كله عرفته من الشيخ أحمد عبد السلام جزاه الله خيرا
الأسباب:
1)أن فى حوالى 40 رواية للرسول صلى الله عليه وسلم للحديث "أعفوا اللحى" "أطلقوا اللحى" "أرخوا اللحى" يعنى الرسول اتكلم على الموضوع ده 40 مرة يبقى حتى لو هو مش فرض ازاى انا اقول انى بحب الرسول صلى الله عليه وسلم وماعملش حاجة هو أكد عليها 40 مرة
2)قال شيخ الإسلام ابن تيمية رحمه الله : ( يحرم حلق اللحية ) وقال القرطبي : ( لا يجوز حلقها ، ولا نتفها ولا قصها )
3)دى من أكتر الحاجات اللى أثرت فيا وهى القصة بتاعت رسل كسرى عندما جاؤا الى الرسول صلى الله عليه وسلم وراهم قد حلقوا لحاهم وأطلقوا شواربهم فأعرض الرسول صلى الله عليه وسلم بوجهه عنهم وقال لهم من أمركم بهذا قالوا ربنا كسرى فأمسك صلى الله عليه وسلم بلحيته وقال "وأمرنى ربى بهذا"........وأنا مش مستعد ان لما الرسول صلى الله عليه وسلم يشوفنى يوم القيامة يعرض بوجهه عنى
4)اللحية دى اللى بيشوفها بيعرف ان ده مسلم فده لوحده كده دعوة للإسلام يعنى انت طول مانت ماشى عمال تاخد حسنات وانت مش خسران حاجة انت مش شايلها على كتفك وماشى بيها يعنى.
أدلة عقلية:
الكلام الجاى ده ارائى الشخصية
1) الله سبحانه و تعالى خلق نوعين من البشر وجعل فيهم صفات متشابهة وأخرى مختلفة; يعنى فى النوعين شعر الرأس بينمو لكن عند الرجال فقط شعر اللحية ينمو........ طب ليه أنت تحلق لحيتك عشان تكون ذى النوع التانى ؟؟!!!
2) الرسول صلى الله عليه وسلم أمرنا ان احنا نشرب و ناكل واحنا قاعدين مش واقفين (ودى سنة مش فرض)ودلوقتى العلماء اكتشفوا أن الأكل وانت واقف مضر جدا للجسم .... نفس الموضوع بالنسبة للحية أنا بنفذ كلام الرسول صلى الله عليه وسلم وأنا متأكد 1000% إن ده مفيد ليا ومتأكد أن العلم هيثبت الكلام ده فى يوم من الأيام . وحتى لو العلم موصلش لحاجة أنا هافضل أنفذ كلام الرسول صلى الله عليه وسلم لأن موضوع العلم ده مجرد تثبيت بس مش أكتر.
3) زى ما الهندى شكله بيكون مميز و اليابانى لبسه مميز وكلهم بيفتخروا بده انت كمسلم لازم تكون مميز لأن أنت انسان مش عادى ... إنت عبد الله و مافيش حاجة ممكن تفتخر بيها أكتر من كده
الحجج الفارغة:
1) دى حاجة أنا نفسى كنت مقتنع بيها والشيخ أحمد بس هو اللى أقنعنى وهى "حتى لو الدقن صح معظم الناس الى بيربوا دقنهم بيكونوا ناس تعاملهم فظ و معظم البياعين منهم بيكونوا مش أمناء و لما واحد بيربى لحيته بيفشل فى الدراسة بيكون مش متحضر" وفرحت كده ان أنا جبت جون فيه و مش هيعرف يرد عليا
قاللى الملتحين دول مجموعة من الناس يعنى لازم هيكون منهم ناس محترمة و ناس مش كويسة وناس مربياها عشان الناس تقول عليه مؤمن وناش مربياها عشان المحل بتاعه يشتغل و بعدين فى كام واحد مش مربى دقنه و برده حرامى و أسلوبه وحش اِمعنا بتتكلم على دول
قولتله عشان دول معظمهم كده
قاللى مش معنى ان اللى انت اتعاملت معلهم كده يبقى كله كده وبعدين ليه متربيش انت لحيتك و تكون المثال الكويس ؟؟!!!
فأنا اتكتمت بعد اخر كلمة و قلت فى نفسى فعلا لو انا مش بعمل الحاجة دى (وأنا شايف انها صح) عشان الناس اللى بتعملها بيعملوا حاجات تانية غلط يبقى اللى مش مسلم ليه حق ان هو مايدخلش الاسلام لما يشوف المسلمين بيتصرفوا وحش....يبقى معنى كده انى مش هاعمل حاجة صح ابدا عشان أكيد هيكون فى ناس بيعملوها و في نفس الوقت بيعملوا حاجات تانية غلط
2) أن الحديث اللى فى الأول فى رواية ليه "قصوا الشارب وأطلقوا اللحى وخالفوا اليهود" فبما ان دلوقتى اليهود مش شرط يربوا دقنهم فده كان أمر فى وقت الرسول صلى الله عليه وسلم بس لكن مش دلوقتى
الرد: فعلا كان المفروض انهم يخالفوا اليهود لكن فى 40 رواية اخرى مافيهاش الجزء الأخير ده معنى كده انه مش مختص بزمان الرسول فقط
3) فى واحد قاللى لو عايز تقتدى بالرسول صلى الله عليه وسلم فعلا يبقى تلبس جلبية زيه ماتلبسش بنطلونات و تيشيرتات
الرد: كان فى حاجات كتيير الرسول صلى الله عليه وسلم بيعملها مختلفة عن الحاجات اللى بنعملها دلوقتى بس اللحية بالذات من الحاجات اللى أمر بـيها وأكد عليها أكتر من مره يبقى معنى كده ان دى حالة خاصة مش مرتبطة بزمان الرسول صلى الله عليه وسلم
4) زمان كان كل الناس بتربى لحيتها أبو جهل نفسه كان عنده لحية يعنى معنى كده ان دى حاجة مرتبطة بزمان الرسول صلى الله عليه وسلم
الرد: نفس الرد اللى قبله"
أنت بتمسك في القشور وسايب الخلق والحاجات المهمة اللي هتفرق فعلا في التعامل بين الناس وبعضها
طبعا عندك حق في دي لازم الاهتمام يكون على الأخلاق كمان بس خلليييييي بالك من حاجة مهمة جدا ....... الإسلام مفيهوش حاجة اسمها دي من قشور الدين ودي من الحاجات المهمة ..... واعرف إن مدى تمسكك بالحاجة اللي طلبها منك الرسول صلِّي الله عليه وسلم بيعبر عن مدى حبك ليه ولله تعالى حتى لو إنت مش شايف مدى اهمية الحاجة دي
كلمة أخيرة
*الحمد لله أن ربنا هدانا للإسلام وأن سنة الرسول صلى الله عليه وسلم كلها محفوظة يعنى ممكن تقتدى بيه فى أى حاجة انت عايزها مش زى الأديان الأخرى اللى بيكون فيها الناس ضائعة بمعنى الكلمة...... فاحنا نحمد ربنا على النعمة دى باستغلالها
*خليك مثال جيد للناس التانية و اقتدى بالرسول و فى نفس الوقت خليك كوول و هزر واعمل اللى انت عايزه.
